UMSINDO ABE-PIRATES BENQOBA IMIKLOMELO YE-PSL
LINDOKUHLE NGCOBO
SEKUSUKE umsindo ezinkundleni zokuxhumana abalandeli beMamelodi Sundowns bekhala ngomcimbi wePSL wokubungaza abadlali nabaqeqeshi abenze kahle ngesizini ka 2024/2025. Kulandela ukukhonya kwe-Orlando Pirates kulo mcimbi obuyizolo ebusuku, njengoba inqobe imiklomelo engu-7.
Abe-Sundowns bakhala ngomklomelo weMidfielder of the season onqotshwe uMakhehleni Makhaula weZimnyama, ahlule kuyo uTeboho Mokoena noMarcelo Allende bamaSandawana.
Omunye umklomelo osuse ukukhuluma oweBetway Premiership Defender of the season othathwe uNkosinathi Sibisi(Orlando Pirates) obekukhona kuwoGrant Kekana(Mamelodi Sundowns). Abathandi beDowns baphakamisa ukuthi lo mklomelo bekumele unikezwe uKhuliso Mudau obengaqokiwe.
Akugcini lapho uSipho Chaine weZimnyama udle umhlanganiso wokuba unozinti ovelele ehlula uRonwen William.
URelebohile Mofokeng wePirates unqobe iBetway Premiership Young Player of the Season neMTN 8 Last Man Standing, wakhala ngaphansi kwemithathu abeqokelwe kuyo. Okubalwa kuyo iPlayers' Player of the season neFootballer of the season, okutholwe uLucas Ribeiro Costa weSundowns.
UMofokeng uphinde wakhala ngaphansi kwiNedbank Cup Most Promising Player ethathwe uzakwabo uMbekezeli Mbokazi. USiphamandla Msezane wePirates udle umhlanganiso wokuba iDSTV Diski Challenge Top Scorer.
Okubonakala kukhalisa kakhulu abalandeli beSundowns, ukuthi iqembu labo ilona elidle isicoco seBetway Premiership, iPirates yalala isibili. Kule miklomelo kuvota abahlaziyi bebhola nabezindaba zemidlalo(Izintatheli).
