UBROOS UCACISA NGABADLALI ABABIZA KWIBAFANA
UMQEQESHI weBafana Bafana uHugo Broos ukhiphe ingonyuluka ngabadlali ababiza eqenjini lakhe.
IBafana seyizibekisele indawo emdlalweni weNdebe yoMhlaba yango-2026, ezosingathwa eCanada, Mexico nase-USA. Emuva kokwehlula iRwanda ngo 3-0 eMbombela Stadium, eMpumalanga. Amagoli ezikaBroos ashaywe uThalente Mbatha, Oswin Appollis no-Evidence Makgopa. IBafana yagcina ukudlulela kwiNdebe yoMhlaba ngo-2010, ithole indawo ngokuba abasingathi. Leli qembu lesizwe lagcina ukuzingenela ngezikhwephe zalo kwiNdebe yoMhlaba ngonyaka ka-2002, eJapan naseSouth Korea.
Ekhuluma nabezindaba eMbombela Stadium uBroos uthi uyazi ukuthi kukhona abalandeli beBafana abaphikisana nezinqumo zakhe.
"Mina ngibiza abadlali abaseqophelweni eliphezulu, abakwazi ukungilalela benze lokhu engikufunayo. Kuyajabulisa ukuthi izinqumo engizithathayo zisilethela imiphumela emihle," kubeka uBroos.
Lo mqeqeshi ukhuluma kanje nje kukhona abalandeli abamgxeka ngokushiya ngaphandle uThembinkosi Lorch ogijima kwiWydad AC yaseMorocco noBradley Grobler odlalela iSekhukhune United. Bamsolwa ngokubiza uMakgopa noMbatha be-Orlando Pirates. Kuphinde kubekhona abangagculisekile ngendlela uBroos akhuluma ngayo ngabadlali beKaizer Chiefs.
