OWE- SUNDOWNS USOLA ABADLALI BESHAYA IGALLANTS
I-MAMELODI Sundowns iqhubekile nokushubisa umbango weligi, ibuyela esicongweni seBetway Premiership, ngemuva kokushaya iMarumo Gallants FC ngo 3-1, eLoftus Versfeld Stadium, ePitoli izolo.
Amagoli Amasandawana ashawe nguSiphosakhe Ntiya-Ntiya weMarumo, okube ngumkhonto ogwaze ekhaya noTeboho Mokoena, oshaye amabili esuka ebhentshini. Kwathi eleBahlabane Ba Ntwa lashawa nguNdabayithethwa Ndlondlo.
Ekhuluma nabezindaba umqeqeshi weSundowns uMiguel Cardoso uthe ujabule ngomphumela kodwa akagculisekile ngendlela abadlali bakhe, abadlale ngayo.
"Lapha kwiMamelodi Sundowns sinezifiso esifuna ukuzifeza, nendlela esifuna ukudlala ngayo. Ngeshwa ngeke ngikwazi ukuveza amaqhinga ethu obala. Angigculisekile ngendlela esidlale ngayo namuhla. Ikakhulukazi indlela esiqale ngayo umdlalo, angazi mhlawumbe abadlali bami sebethatha izinto kancane. Emhlabeni akumele uthathe izinto kancane," kubeka uCardoso.
