OWE-ORBIT COLLEGE AKAGCULISEKILE NGOSALENG

LINDOKUHLE NGCOBO 

UMQEQESHI we-Orbit College fc engomakoti kwiBetway Premiership uPogiso Makhonye, usephumule obala ngokungagculiseki kwakhe ngomdlali waleli qembu uMonnapule Saleng.

USaleng ubolekiswe i-Orlando Pirates kuMswenko Boys, ekuqaleni kwesizini ngesivumelwano sokuthi uzohlala isizini ka-2025/26 yonke kuleli qembu laseNorth West.

Ekhuluma emsakazweni iMetro FM uMakhonye udalule ukuthi selokhu efikile (Saleng) kwi-Orbit College akakadlali ngokwezinga aziwa ngalo.

"Okwamanje ngicabanga ukuthi akakasiniki lokhu esikulindele kuye(Saleng) njengomdlali osezingeni eliphezulu. Ungumdlali ofika negama elikhulu, izinto ezifana nalezi kumele sihlale phansi sizixoxe njengeqembu. Njengamanje sesiqala ukudlala kungcono ekhona noma engekho(Saleng)," kubeka uMakhonye.

USaleng wake wagijima kwi-Orbit College isidlala esigabeni esiphansi, iSAFA second Division, ngaphambi kokuba adlala kwiFree State Stars eyamdayisela iPirates ngo-2021. iPirates yambolekisa(Saleng) kwiSwallows ngesizini ka-2021/22 nokuyilapho adlala imidlalo engu-22.

Lo mdlali(Saleng) ubengomunye wabadlali abagqamile kweZimnyama njengoba eshaya amagoli angu-5 emidlalweni yokuqala kwesizini ka-2022/2023.