IBANYANA BANYANA NENSELELO YOKUSHAYA INIGERIA KOWE-WAFCON
LINDOKUHLE NGCOBO
UMQEQESHI weBanyana Banyana uDkt Desiree Ellis uthi sebekulungele ukubhekana neNigeria emdlalweni weSemifinal yeCAF Women's Africa Cup of Nations (WAFCON) 2024, eLarbi Zaouli Stadium, eCasablance ezweni laseMorocco namuhla ntambama. Lo mdlalo uzoqala ngehora lesi-18h00 ngokwesikhathi sakuleli, kanti uzoqala ngo-17h00 ngokwesikhathi saseMorocco.
Kulindeleke ukuthi lo mdlalo ushise njengoba lawa mazwe efuna ukunqoba isicoco ngezizathu ezahlukene. IBanyana ifuna ukuba izwe lokuqala ukuvikela isicoco seWAFCON ngemuva lilandela iNigeria. Ngakolunye uhlangothi iNigeria ifuna ukuqopha umlando wokunqoba izicoco eziyishumi, njengoba inezicoco ezingu-9.
"INigeria izwe esilazi kahle, sidlale kaningi nabo eminyakeni edlule. Sibenosuku olulodwa lokuzilolongela lo mdlalo, akukho okuningi ebesingakwenza ngosuku olulodwa. Kunezinto ezimbalwa ongazilungisa nezimbalwa ongasebenza phezu kwazo. Ithimba lethu lezobuchwepheshe limatasa ngemuva kwethu ukuqinisa wonke amabhawodi, ngicabanga ukuthi awukudingi ukugqugquzelwa kakhulu uma uyodlala umdlalo we-semifinal, sesikulungele ukudlala lo mdlalo," kubeka u-Ellis.
