USOBISHINI UMSHAYELI OBELAYISHE ABAFUNDI EPHUZE UTSHWALA
LINDOKUHLE NGCOBO
KUSHONE umfundi oyedwa, kwalimala abangu-10 ngesikhathi kugingqika itekisi ebithwele abafundi besikole eNdwedwe, izolo.
Kusolakala ukuthi umshayeli wale tekisi ebithwele abafundi ubedle amanzi amponjwana.
Namuhla uNgqongqoshe wezokuThutha KwaZulu-Natal(KZN) uMnuz Siboniso Duma uveze ukuthi usejube ithimba eliphenya ngale ngozi, wadalula ukuthi leli thimba lizophenya nenhlangano yezomoto ezithwala abafundi eNdwedwe.
"Namuhla ekuseni sithole izindaba ezibuhlungu zokudlula emhlabeni komfundi oyedwa. Abangu-6 sebekhishiwe esibhedlela ngemuva kokuthola ukwelashwa, abangu-4 basathola ukwelashwa esibhedlela kulandela ukulimala kabucayi ekhanda nasemzimbeni," kuchaza uDuma.
Uphethe ngelithi bazothathelwa izinyathelo bonke abathintekayo kulobu budedengu.
