UNTULI UFUNA IZIMPENDULO KONGQONGQOSHE ABASOLWA NGENKOHLAKALO
LINDOKUHLE NGCOBO
UNDUNANKULU waKwaZulu-Natal(KZN) uMnuz Thamsanqa Ntuli, usebhalele uNgqongqoshe wezeMfundo uMnuz Sipho Hlomuka wezeMfundo eKZN noNgqongqoshe wezeMpilo eKZN uNkk Nomagugu Simelane-Mngadi izincwadi, efuna umbiko ogcwele mayelana nezinsolo abathinteka kuzo(uHlomuka noSimelane-Mngadi).
Kulandela ukuvela kwezinsolo zokuthi uHlomuka ugxambukele ekuhlomuleni kwezinkampani ngohlelo lokuhambisa ukudla ezikole, elinemali elinganisela ku R2.9 billion. Lo Ngqongqoshe ongokudabuka eMnambithi usolwa ngokuhambisa lolu hlelo ngokwezepolitili. Kuvela ukuthi kunenkampani yaseMnambithi ethole lo msebenzi ngoba iphethwe isihlobo sakhe(UHlomuka). Kuqubuke izindaba zokuthi ezinye izinkampani eziqokwe kulolu hlelo ngezabaholi be-ANC abathize.
Nokho uHlomuka umi ngelithi inkampani yaseMnambithi wayeyingxenye yayo ngo-2015. NgokukaHlomuka uthi njengamanje akanaso isiqiniseko sokuthi le nkampani ihlomulile yini kulolu hlelo, ngoba sewahoxa kuyo.
Ngakolunye uhlangothi uSimelane-Mngadi usolwa ngokuba nesandla ekuxoshweni komsakazi uJacinta Ngobese-Zuma kwiVuma FM.
Kusokala ukuthi lo Ngqongqoshe wezeMpilo udinwe umkhankaso kaJacinta iMarch and March, evimba abakuleli ngokungekho emthethweni ukuba bathole usizo ezikhungweni zeziMpilo zikaHulumeni. Kukhokalaka ukuthi uSimelane-Mngadi uzama ukuphusha inhlese yezoMbusazwe.
Kuvela ukuthi uNgqongqoshe unqumele ogodweni abaphathi balesi siteshi esiseMhlanga, ukuba baxoshe uNgobese-Zuma kungenjalo uMnyango uzohoxisa izikhangiso zawo kulo msakazo. Ngokwalezi zinsolo uSimelane-Mngadi wasabisa ngezilithi uzonxenxa yonke iminyango kaHulumeni ukuba yenze okufanayo.
UNgqosheshe wazichitha lezi zinsolo. Waze wasabisa ngelithi uzobathathela izinyathelo labo abasho lokho.
Okhulumela ihhovisi likaNdunankulu uMnuz Lindelani Mbatha ukuqinisekisile ukuthi uNdunankulu usethumelele labo ngqongqoshe izincwadi efuna izimpendulo.
"Lolu lwazi luzosiza ngezinyathelo uNdunankulu okumele azithathe ukubhekana nalesi simo. Konke lokhu kuzokwaziswa esihlangalaleni. UNdunankulu uNtuli uzibophezele ekuphatheni kahle kwezimali zikahulumeni, ucela kube nokuthula nozinzo nokubekezelelana," kubeka uMbatha.
