UMCHUNU UTHI AMAZWE KUMELE ALANDE IZAKHAMUZI ZAWO MANJE
LINDOKUHLE NGCOBO
UNgizwe Mchunu, ongomunye wabaholi abaphambili enhlanganweni iMarch and March eholwa nguJacinta Ngobese Zuma, uncome uhulumeni waseGhana ngokuthatha isinyathelo sokulanda izakhamuzi zayo eNingizimu Afrika ngendlela ehloniphekile.
UMchunu ukhulume kanje esithangamini sabezindaba eJeppe Park, eGoli, namhlanje.
Uthe wonke amazwe kumele afunde kuhulumeni waseGhana, othumele indiza ezolanda abantu bakhona abangu 300 esikhumulweni sezindiza i-OR Tambo International Airport. Laba bantu sebebuyela e-Accra, eGhana.
“IGhana iyisibonelo esihle. Kusasa kulindeleke ukuthi iphinde ithuthe abanye abantu abangu-600 ibabuyisele ekhaya(Ghana). Sicela wonke amazwe enze njengayo. Sicela namanye amazwe alande abantu bawo kungakashayi isikhathi. Ngeke sivume abantu bokufika ngokungekho emthethweni baxhaphaze izwe lethu besebenzisa izaba zokuthi basiza ngesikhathi sobandlululo noma sinobudlelwano namazwe abo,” kusho uMchunu.
Kulesi sithangami sabezindaba, uNkosikhona “Phekal’Umthakathi” Ndabandaba uxwayise abantu baleli ukuthi bangathengi ezitolo zabokufika.
"Kusukela kusasa mhlaka 1 June 2026. Bantu bakithi yekani ukuthenga ezitolo zabokufika nokuthuma izingane zenu khona. Baqalile ukufaka ushevu ezimpahleni, lalelani nina bondlebekazizwa," kubeka uNdabandaba.
