KUBOSHWE ABATHATHU NGOKUDUNA ITEKISI
LINDOKUHLE NGCOBO
KUBHIMBE uhlelo kubasolwa abathathu ababoshwe namuhla OThongathi ngecala lokuntshontsha itekisi ethwala abafundi besikole.
Kuvela ukuthi amaphoyisa aseVerulam ngokungahlanyela nenkampani yonogada bakaRUSA balunywe indlebe mayelana nokuntshontshwa kwetekisi iVW Crafter, edunwe eBlackburn enyakatho neTheku namuhla ekuseni.
Abakwasidlodlo bathole umkhondo wale moto ngobuchwepheshe besimanje, ngesikhathi igudla emgwaqeni onguR614 ibheke e-Esnembe. Nokuthe ngokuphazima kweso abasolwa babanjwa endaweni yase-Upper OThongathi esiteshini sokuthela iphethiloli.
Amaphoyisa abophe abasolwa abathathu, ababanjwe behamba ngetekisi okukhokhalakala ukuthi intshontshiwe nomshayeli wetekisi oneminyaka engu-43 ubudala, eboshwe ngentambo.
Echaza kabanzi ngalesi sigameko umgilwa udalule ukuthi ubesendleleni eyothatha abafundi besikole ngesikhathi evinjwa amadoda amabili emgwaqeni.
"Owesithathu uvumbuke ezimobeni wakhipha ummese wangiphoqa ukuthi ngiphume ngiye ngemuva kwemoto," echaza.
Abasolwa ababoshiwe kulindeleke ukuthi bavela enkantolo maduze.
